YOLG`ON MUOMILA

Ko’ngil qushlarini bir zum ozod qoyib, ko`nglizdan so`rab ko`ringchi, ruhiyatingizdagi bir xillik nechog`lik o`zingizga azob berib keladi. Savolimdan hayron bo`layotgandirsiz?

 Har kungi qiladigan ishlaringizni hisob-kitob qilib, ko`z oldingizga bir keltirib ko`ring-chi. Erta tongdan turasiz. Erinib ketayoygandaysiz, uzoqlarga ketib qolgingiz kelaveradi. Hammasiga qo`l siltab olislarni ko`zlaysiz,. Nimaga? Tuni bilan ayolingiz rozg`orning kemtigi qachon to`lishini so`rayverib joningiz halqumingizga keldi?

Tashqariga otilib chiqib, so`rida o`tirgan mushtipar onangizga ko`zingiz tushadi. “Yaxshi yotib turdingmi o`g`lim!”, desa, ko`ngilingiz ezilibgina:”Rahmat, oyijon, tosh qotib uxlabman. Qushday yengil turdim!”, deysiz. Aldaysiz. Mana muomila. Ishxonaga otlanayotib qizalog`ingizning:”Yaxshi borib keling, dadajon!” degan so`zidan iyib ketasiz,. Aslida ishga yaxshi borib-kelib bo`larkanmi? Injiq rahbarning harhashalari joningizga tekkani shundoqqina yuzingizdan bilinib tiribdi.

 Ostona hatlab ko`chaga chiqasiz. Ko`shningiz uzundan-uzoq hol-ahvol so`raydi. Kulib javob qaytarasiz. “Yaxshi, rahmat. Hammasi joyida!”. Yuragingiz ezilib ketdi. “Onamning ko`zlarini davolatish kerak!” deya uvvos solgingiz keladi. Baxtiyorligingizdan ichingizga sig`may ketayotganday qilib ko`rsatasiz o`zingizni.

 Ishxonaga kelasiz. Qorovul sog`ligingizni so`raydi. “Otdayman” deya yuragingizni changallaysiz. Kecha boshliqning qilgan ta`na-dashnomlari yodingizga tushib ketadi. Istab-istamay qadam tashlaysiz. Qani endi birov bor ket, dam ol, desa. Ketib yuborarmidingiz? O`zingizdan, o`z ruhiyatingizdan qochib qayerga ham borish mumkin?

 Ranjimang. Chunki bir sizning emas, atrofingizdagi hammaning muammosi shu. Hamma ham ana shunday muomila qiladi. Kayfiyat insonda hamisha barqaror turmaydi. Ishoning, bugungi muammolaringiz ertaga o`z-o`zidan hal bo`lar. Aldab yashashning ham oxiri bordir. Rostdan ham, tuni bilan miriqib uxlarsiz. Onangiz qaltiroq qo`llari bilan duo qilib, ortingizdan ko`zidagi mehr nurini to`kib darvozagacha kuzatib qoyar. Ortiq yuragingiz bezovta qilmas. Agar men ham aldayotgan bo`lsam ma`zur tuting.

                                                        ESHMURODOVA DURDONA